ప్రమోటర్‌ది తప్పులేదు, మాజీ మంత్రే కారణం.. కోల్‌క‌తా వివాదంపై పోలీసులకు మెస్సీ ఆఫీస్ లేఖ

ఫుట్‌బాల్ దిగ్గజం లియోనెల్ మెస్సీ కోల్‌కతా పర్యటనలో జరిగిన గందరగోళం కేసు కీలక మలుపు తిరిగింది. గతేడాది డిసెంబర్‌లో సాల్ట్ లేక్ స్టేడియంలో జరిగిన ఈవెంట్ రసాభాసగా మారడానికి ఈవెంట్ ప్రమోటర్ సతద్రు దత్తా కారణం కాదని, పశ్చిమ బెంగాల్ మాజీ క్రీడాశాఖ మంత్రి ఆరూప్ బిశ్వాస్ సహా మరికొందరు ప్రొటోకాల్‌ను, భద్రతా ఏర్పాట్లను ఉల్లంఘించడమే అసలు కారణమని మెస్సీ కార్యాలయం స్పష్టం చేసింది. ఈ మేరకు కోల్‌కతా పోలీసులకు మెస్సీ కార్యాలయం నుంచి పంపిన ఒక ఈ-మెయిల్‌ను ప్రమోటర్ సతద్రు దత్తా మీడియాకు విడుదల చేశారు.

గతేడాది డిసెంబర్ లో ఎంతో ఆర్భాటంగా నిర్వహించిన 'గోట్ ఇండియా టూర్' తీవ్ర గందరగోళం, రసాభాసగా మారిన విషయం తెలిసిందే. నిర్వహణ లోపాలు, తీవ్ర భద్రతా వైఫల్యాల ఆరోపణల మధ్య గంట పాటు జరగాల్సిన ఈ కార్యక్రమం కేవలం 20 నిమిషాల్లోనే ముగిసింది. మాజీ మంత్రి ఆరూప్ బిశ్వాస్, పలువురు రాజకీయ నాయకులు సెల్ఫీల కోసం, మెస్సీతో మాట్లాడేందుకు మైదానంలోకి దూసుకురావడంతో కార్యక్రమాన్ని అర్ధాంతరంగా నిలిపివేయాల్సి వచ్చింది. దీంతో అధిక ధరలకు టిక్కెట్లు కొనుగోలు చేసిన అభిమానులు తీవ్ర నిరాశకు గురై మెస్సీ వెళ్లిపోయిన తర్వాత స్టేడియంలోని కొన్ని భాగాలను ధ్వంసం చేశారు.

ఈ ఘటనపై మెస్సీ కార్యాలయం పంపిన లేఖలో కీలక విషయాలను ప్రస్తావించారు. "కార్యక్రమాన్ని ముందుగానే ముగించాల్సి రావడం దురదృష్టకరం. ఈ నిర్ణయం తీసుకోవడానికి ఈవెంట్ ప్రమోటర్ సతద్రు దత్తా ఏమాత్రం బాధ్యుడు కాదు. ఇది పూర్తిగా ఆయన నియంత్రణలో లేని విషయం. వాస్తవానికి అసలు ఈవెంట్ ప్లాన్‌లో లేని కొందరు వ్యక్తులు ప్రొటోకాల్, భద్రతా ఏర్పాట్లను ఉల్లంఘించడం వల్లే ముందుజాగ్రత్త చర్యగా ఈ నిర్ణయం తీసుకోవాల్సి వచ్చింది" అని లేఖలో స్పష్టంగా పేర్కొన్నారు.

ముందుగా కుదుర్చుకున్న ఒప్పందం ప్రకారం మెస్సీ మైదానంలో ఉన్నప్పుడు ప్రముఖులెవరూ వేదికపైకి రాకూడదని, కేవలం ముగ్గురు కెమెరా ఆపరేటర్లకు మాత్రమే అనుమతి ఉందని లేఖలో వివరించారు. కానీ, అప్పటి క్రీడాశాఖ మంత్రి ఆరూప్ బిశ్వాస్ మైదానంలోకి ప్రవేశించి, షెడ్యూల్‌లో లేని కార్యకలాపాల్లో పాల్గొన్నారని ఆరోపించారు. "మంత్రి ప్రవేశంతో పాటు సుమారు 40 మంది గుర్తింపు లేని ఫొటోగ్రాఫర్లు, కెమెరా ఆపరేటర్లు, ఇతర అనధికార వ్యక్తులు నిర్బంధిత ప్రాంతాల్లోకి చొచ్చుకువచ్చారు. ఈ చర్యల వల్ల మెస్సీ భద్రత, సౌకర్యం, వ్యక్తిగత స్వేచ్ఛకు భంగం కలిగింది. దీంతో ఆయన ముందుగా అనుకున్న కార్యక్రమాల్లో పాల్గొనడం అసాధ్యంగా మారింది" అని లేఖలో తెలిపారు.

అనధికార సిబ్బంది మైదానంలోకి వచ్చి, ముందుగా అంగీకరించిన ప్రణాళికలను మార్చడానికి ప్రయత్నించడం వల్లే మెస్సీ వేదిక నుంచి త్వరగా నిష్క్రమించాల్సి వచ్చిందని స్పష్టం చేశారు. ఈ ఘటనకు సంబంధించి నిర్వహణ లోపాల ఆరోపణలపై అరెస్ట్ అయిన దత్తా, నెల రోజుల పైగా జైలులో ఉండి బెయిల్‌పై విడుదలయ్యారు. అనంతరం ఆయన ఆరూప్ బిశ్వాస్‌పై పోలీసులకు ఫిర్యాదు చేశారు. ఈ ఫిర్యాదుపై పోలీసులు విచారణ జరుపుతున్న నేపథ్యంలో మెస్సీ కార్యాలయం నుంచి వచ్చిన ఈ లేఖ ప్రాధాన్యత సంతరించుకుంది. తన అరెస్టు సమయంలో కూడా మాజీ మంత్రి పాత్ర గురించి మెస్సీ సలహాదారులు పోలీసులకు పలుమార్లు తెలిపారని, అవసరమైతే మరిన్ని వివరాలు అందించేందుకు సిద్ధంగా ఉన్నారని కూడా చెప్పారని దత్తా వెల్లడించారు.